Ganup ari i,i pargogoi ho lakkam tu balian ni jolmai , mangalului ngolu-ngolu siapari tu ahu anakkonmon.Molo nga mulak ho i botari sai iboan ho do kue manang siallangon na lain nagabe lomo ni rohakki.
Amang jo tahe, hape nian siallangon mu do hapei i siang ari i, hape itinggalhon ho dope nalaho lehononmu tu ahu.
Tung masihol do ahu nian mandai loppa-loppa mi, gadong hau na irobus dohot sabe na itutu itamba muse dohot gulamo na itutung i.Amang jo tahe maraburan tijurhi masihol tu loppa-loppami.
Itaon 2005 bulan desember i ma hape hutinggalhon ho di huta nalaho tu pangarattoan on.
Disi huingot dope i haol ho ma ahu massai gomos, madekdek ilu-ilumi dung masuk ahu to mobil carteran nalaho mamboan ahu tu bandara i.
Massai lungun rohakki maninggalhon ho Oma, tong ma alani ngolu-ngolutta na porsuk di hutai,namambahen ahu mangalului ngolu-ngolu ihuta ni jolma on.
Hape nungnga marpitu taon hutinggalhon ho i hutai, tung parsidembanmu pe so boi dope hutuhor.
Huingot ma muse tikki mangido hepeng parsijajanhu tu sikkola i. Di bukka ho ma puro-puro mi, parlimaribuan manang parsappulu ribuan i sai tottong do dilehon ho.
Hape molo hu etong-etong gajim pe tikki i otik do parsadarian i balian ni jolmai.
Amang jo tahe, burjumi tung so tarbayar ahu bei.
Asi ! nimmu manjou goarhi.
Sipata ni baen ma parbadaan tu ho alana ni holong niroha i. Sai nibaen jutjut rohami.
Molo nga songoni marbete-bete maho Oma marsadari saborngin jala mardadi alani gait-gait hi.
Ipagi ari i sai tibu doho lao tu binanga i lao manussi pakkean hi. Sae ma disi tor laho maho tu tataringi laho mangaloppa sarapanhi asa gogo ahu mardalan tu sikkola i.
Oma, aha do naboi tarbahen ahu tu ho ?
Hape ngolu-ngolukku pe so denggan dope.Mangalului sipangananhu pe ahu nga maol.
Amang jo tahe, molo huingot ma muse ho Oma.Dang sadia dope hape na hubaeni.
Malungun do ahu mamereng rupami Oma.
Hujalo do nian gambarmu sian ito dohot abangi alai sampe saonari dang marna i kirim dope.
Oma !, tamiangkon majo ahu ate.
Tung massai porsuk dope parngoluakku poang.
Tung songoni muse boru-boru maksud nalaho gabe parumaenmu. Sai gantung do holokku dibaheni.
Hape tung massai holong do rohakku nian dang alani rupa manang hamoraon nai.
Oma ! Tamiangkon jo lakkaki ate,tamiangkon majo muse boru-boru na huhaholongi i.
Oma !, ai olo dope hamu marbadai dohot bapa i ?
pasip-sip ma ate oma, ai nga songoni bapai.Atik pe ginjang rohanai alai huboto do holong ni rohanai sai tuhita kaluarga naon.
Masihol ahu Oma.
Sai jotjot do madekdek ilu-ilukki molo huingot hamu sude na i hutai.
Tung massai holong hian do rohakku tu ito abangki.Atik ma nian marsogot hasea ahu.Tung baheonku ma hamu sude sonang diganup ari.
Oma !, tamiangkon majo ahu ate.
Tung mauliate do ahu tu Tuhan i, ai boi do hujaga dirikki sian sibolisi. Atik pe nian sai godang do cobaan na ganup tikki sai manggoda imanki,alai sai hutuddalhon doi.Tong ma alani gogo ni tamiangmi.
Oma !, pette jo ahu da.Ikkon berengon mu do ahu mangoli da.
1 comments:
gabe lungun iba bah...
sip...!!!
Posting Komentar